आजादी केर अमृत महोत्सव पर आयुर्वेद महाविद्यालय द्वारा डी.ए.वी. पब्लिक स्कूल , दरभंगा में पोषण पर कार्यक्रम के आयोजन कैल गेल।

एहि मौके पर प्राचार्य प्रो. दिनेश्वर प्रसाद छात्र सबहक बीच जीवन संरक्षक आ आयु वर्धक आयुर्वेदऽक सिद्धांत सब कें सहजता के संग रखलनि, ओ बतेलथि जे प्राकृतिक जीवन शैली के अपनेला क बादे नमहर आ स्वस्थ जीवन को प्राप्त कैल जा सकैत अछि। ब्रह्म मुहूर्त में जागरण पर बल दैत प्रोफेसर प्रसाद बतेलथि जे ई प्रकृति केर अमृतवेला होइत अछि, जाहिमे प्रकृति विशुद्ध रूप सं पंचामृत के पान करा रहल होईत छैथ। जे छात्र एहि मुहूर्त में उठि के अध्ययन करैत छथि, हुनकर मेधा आ शारीरिक शक्ति के सर्वांगीण विकास होइत अछि।
डॉ मुकेश कुमार के द्वारा पावर पॉइंट प्रेजेंटेशन के माध्यम सं पोषण केर महत्व केऽ बारे में छात्र सब के बताओल गेल। ओ संतुलित आहार के संगहि संग प्राकृतिक आहार के बारे में छात्र लोकनि के बतेलथि। जेहने खाए अन्न ओहने होयत मन पर जोर दैत कहलन्हि जे वर्तमान समय में छात्र सबहक द्वारा जंक फूड आदि के सेवन तेजी सं कैल जा रहल अछि जे कि स्वास्थ्य के दृष्टिकोण सं सही नहि अछि।

डॉ दिनेश कुमार आयुर्वेद के विश्व’कऽ प्राचीनतम चिकित्सा पद्धति बुझबैत कहलन्हि जे आयुर्वेदऽक सिद्धांत सभकेँ जे अपन जीवन में जतबे उतारैत छथि, ओकर जीवन उत्तरोत्तर आरोग्यमय होईत चलि जाईत अछि। आयुर्वेद विश्व के एकमात्र चिकित्सा पद्धति अछि, जे स्वस्थ मनुष्य केर स्वास्थ्यऽक रक्षा के बात करैत अछि। ओ कहलनि जे भारत देशऽक धरती पल्लवित आ पुष्पित भेल,आयुर्वेद दुनिया के सर्वप्रथम प्लास्टिक सर्जरी केनाय सिखौने अछि। प्लास्टिक सर्जरी के जनक महर्षि सुश्रुत के कहल जाइत छन्हि। रोग प्रतिरोधक क्षमता के विकसित करबाक हेतु आयुर्वेदिक दिनचर्या के संगहि -संग गिलोय,तुलसी,काली मिर्च के काढ़ा पीबा के कहैत पूरा दुनिया में गोल्डन मिल्क के नाम सं प्रसिद्ध हल्दी दूध पीबा के सलाह डॉ दिनेश कुमार के द्वारा देल गेल।