#MNN@24X7 मिथिलाक सपूत धनिकलाल मण्डल आब हमरा लोकनिक बीच नहिं रहला। हुनक निधनसँ समाजवादक आंगनमे एकटा पैघ शून्यता आबि गेल अछि। निकट भविष्यमे ओकरा भरब दुरूह सन बुझा रहल अछि। हिनक जन्म 30/03/1932 मधुबनी जिलाक घोघरडीहा प्रखण्डक बेल्हा गाममे भेलनि आ निधन 13/11/2022 केँ चण्डीगढ़मे भेलनि।
प्रदेशक राजनीतिसँ राष्ट्रीय राजनीतिमे महत्वपूर्ण हस्तक्षेप रखनिहार धनिकलाल जी वंचित वर्गक सदिखन पृष्ठपोषक रहला। ई हरियाणाक राज्यपाल, बिहार विधानसभाक अध्यक्ष सेहो रहला। मोरारजी देसाई केर प्रधानमंत्री रहैत हुनक मंत्रीमण्डलमे केन्द्रीय गृहराज्यमंत्रीक पदकेँ सुशोभित केलनि। वर्ष 1977 आ 1980 मे दू बेर झंझारपुरसँ लोकसभाक लेल चुनल गेला। मण्डल जी 1967 सँ 1974 धरि बिहार विधानसभाक सदस्य छला। विधानसभाक अध्यक्ष पदपर 1967 सँ 1969 धरि आसीन रहला।
हरियाणाक राज्यपालक रूपमे ई 1990 सँ 1995 धरि कार्यरत रहला।
आइ हिनक स्वर्गवाससँ मिथिलामे कन्नरोहटि पसरल अछि। हमरा टीम दिससँ सेहो दिवंगत आत्माक शांति लेल श्रद्धासुमन अर्पित अछि।
©अखिलेश कुमार झा
